Jamna da focus 3G “Teater»
Avon las vacanzas d’atun han ils scolars dil gimnasi da Mustér giu ina jamna da focus, la 3. classa cun il focus sin teater. Il tema dalla jamna ei staus “viandar cun cor aviert”. Gest perquei ei in pensum per ils scolars stau d’anflar plaids che cuntegnan “cor” ni “Herz”. In pèr exempels fussen: cordial, malsogna dil cor, Corsin, Cornelia, coreivel, herzlich, Herzschmerz, Herztransplantation, barmherzig, herzlos, herzensgut,…
In’autra ga han ils scolars inventau in agen lungatg e lura saviu menar ina pintga conversaziun gest en quei lungatg. Ils lungatgs variavan, havevan ramurs che han en nies lungatg negina muntada, mo ei deva era plaids enconuschents che han denton giu ina autra muntada en ils lungatgs fictivs.
Alla entschatta dalla jamna han ils scolars dalla 3. classa inventau maschinas da nums en pintgas gruppas. Il senn da quei exercezi era d’inventar ina maschina che fa differentas ramurs. Ei astgava esser tut las ramurs pusseivlas, denton negins plaids. L’excepziun era cunsesez ils nums dallas persunas. Entginas gruppas han era integrau in “carstgaun” che ha declarau la maschina.
En plirs exercezis han ils luvrau cun la mimica ed han fatg pantomima. Era la vusch ei stada centrala. P.ex. tier igl exercezi preferiu da D. Flepp, che ha accumpignau ils scolars dalla 3G duront la jamna: “amore”. Duront quest’exercezi sto in dils scolars dir il plaid “amore” ed il rest dalla classa repeta quei plaid cun exact la medema tonalitad.
La mesjamna suentermiezdi han ils scolars da Mustér survegniu visetas d'ina classa dalla scola cantunala da Cuera. Gliez suentermiezdi era il tema buc teater mobein plurilinguissem. La classa ch’ei vegnida da Cuera haveva numnadamein sco lungatg matern talian. A Mustér han entgins scolars il lungatg matern romontsch ed auters tudestg. Duront la sentupada han ils scolars tschentau in a lauter damondas egl’agen lungatg matern.
Il venderdis-sera han ils scolars giu tribuna aviarta. Leu han els menau avon differentas causas ch’els han fatg duront la jamna. Entgins scolars dallas classas pli aultas ni pli bassas ed ils geniturs dils scolars ein era stai envidai cordialmein.
Mona Senn