Il Chor dil gimnasi claustral ha dau il 46avel concert
Davosa turnea per il dirigent Clau Scherrer culs gimnasiasts
DA PAUL DUFF / ANR
Suenter il concert dalla sonda vargada a Trun ei il Chor dil gimnasi claustral serendius la dumengia a Cuera per dar leu il concert edificont ed impressiunont. Dumengia proxima ein els hosps ella baselgia da sogn Francestg a Turitg Wollishofen. Ellas retschas dil chor da giuvenils ein quitordisch giuvens hosps digl exteriur semess ed han cantau las ovras cul medem fiug intern sco ils students dil gimnasi. Els ein arrivai avon in’jamna a Mustér per passentar cheu quendisch dis da project cun lur collegas da Mustér. El rom da brat denter las scolas gimnasialas ell’Africa dil sid, Namibia e China retscheivan era students dil gimnasi dalla claustra da Mustér la schanza da passentar enzacons dis en quellas tiaras.
Tradiziun vivida
Avat Pankraz ha giu iniziau avon 46 onns ils viadis da concert cul Chor dil gimnasi claustral. Dapi gliez onn van ils students onn per onn anoragiu per dar concert en baselgias dalla Bassa. Ursin Defuns ha manteniu igl usit duront siu temps sco dirigent e Clau Scherrer ch’ei dapi 2010 menader musical digl ensemble ha cuntinuau tochen oz cun in eveniment ch’ei daventaus ritual.
Per Scherrer ei il viadi da concert cul chor claustral per inagada igl ultim perquei ch’el surdat la bitgetta en auters mauns. Per in successur ei la latta da prestaziun tschentada fetg aulta, ils responsabels san sefidar sin la detga ch’ei seigi aunc adina reussiu da metter papa suenter ina vacanta.
La cantata da Carl Rütti ei musica penetronta
L’ovra iniziala dil concert ha gest sfundrau il publicum en sentiments profunds. L’oraziun da sogn Clau da Flia cuntegn supplicas cuntradictoricas tier nossas oraziuns. El roga buca per retscheiver, buca per «il paun da mintgadi ni per aura favoreivla», el supplichescha Diu da discargar el, «pren tut quei da mei che mei sparta da tei! Pren mei da mei e tschenta mei diltut en tei!» L’expressiun da quellas supplicas daventa entras la canzun enconuschenta da Josef Gallus Scheel, cantada en baselgia, aunc pli pesonta. Il musicist Carl Rütti ha tschentau la melodia sco basa da sia cumposiziun sco cantata. Ella secunda part lai el entrar effects musicals entras polifonia chorala, cant solistic e la musica orchestrala. Parts en canon fieran undas, sequenzas cuntinuontas fan rebatter igl eco. Il chor conta repetend «miu Segner, miu Diu» ed ils solists presentan las supplicas sigl altar musical che vegn tschentaus digl orchester. La bellezia digl entir ascenda ellas sferas divinas nua ch’igl implorar ton fervent sto anflar accoglientscha. L’oraziun musicala tucca igl auditori el profund. Nua ir cun tals sentiments, sedamonda bein enqualin ch’ha il flad che siara e las larmas che roclan.
Joseph Haydn, il grond cumponist classic
Suenter tal’agitaziun sentimentala vegnan ils tuns levgionts dalla part iniziala dalla sinfonia da Joseph Haydn el dretg mument per quietar l’olma furiusa. La Missa Sancti Nicolai Hob. XXII:6 ha Joseph Haydn cumponiu duront siu engaschament tier il prenci Nicolai Esterhazy igl onn 1772. El ha scaffiu in’ovra impurtonta ella musica sacrala, la quala ils chors impurtonts meinan en lur repertori. Ella part finala «Amen» dil gloria vegn l’aulta valeta pedagogica dil cant percurschida. Sco il rectur Roman Walker dil gimnasi menziuna en siu scriver vegn ei instruiu ellas lecziuns da cant il trer flad, la dicziun, la scolaziun dalla vusch, l’intonaziun ed il sentiment dil tact. En quella fuga che vegn cantada dil chor exact e cun dicziun baroca ein ils fretgs dalla scolaziun da percorscher. Ils solists Letizia Scherrer sopran, Lisa Lüthi alt, Martin Mairinger tenor e Clemens Kölbl bass interpreteschan cunzun la part el credo «Cricifixus etiam pro nobis: sub Pontio Pilato, passus et se pultus est» cun profund’expressiun. Il cant solistic el «Benedictus» ei in ulteriur passus nua ch’il quartet lai resunar sias vuschs en tarlischur. Ils sunadurs e las sunaduras digl Orchester Desertina han sunau cun sentiment e duida retenientscha per schar tarlischar il choral.
Inagada dapli ha il concert demussau la gronda reputaziun dil dirigent Clau Scherrer. L’elecziun dalla litteratura sacrala dat access als giuvens carstgauns tier la musica classica. In tal process vegn buca dad oz sin damaun ed el drova motivaziun. Che quei ei gartegiau ad el ed als ulteriurs pedagogs da musica el gimnasi han las producziuns cantadas cun ardur demussau claramein. La valeta dil cant communabel, che ha giu siu origin el sedischavel tschentaner tenor la cronica dalla claustra, ha aunc oz gronda muntada, mintga cantadura e cantadur vegn pertscharts tgei dinamica da forza ch’il cantar en cuminonza scaffescha.